काठमाडौँ । गैरआवासिय नेपाली संघ (एनआरएनए) अन्तर्राष्ट्रिय समन्वय परिषद्का वर्तमान युवा संयोजक अब्दुल बासिदले युवा उपाध्यक्ष पदमा उम्मेदवारी घोषणा गरेका छन् । आगामि कार्यकालका लागि युवा उपाध्यक्ष पदका दावेदार अब्दुल युवा लक्षित कार्यक्रम ल्याउने तयारीमा जुटेका छन् ।
१८ वर्षदेखी कतारलाई कर्मथलो बनाउँदै आएका अब्दुलले हाल नेपाल, कतार र बेलायतमा व्यवसाय सञ्चालन गर्दै आएका छन् । एनआरएनए युवा संयोजक हुँदा ब्रिटिश कम्पनी ‘बेलाको’ होम अप्लाइन्स भित्र्याएका अब्दुलले सयौंको संख्यामा नेपालीहरुलाई रोजगारी प्रदान गरेका छन् ।
गैरआवासिय नेपाली संघ (एनआरएनए) अन्तर्राष्ट्रिय समन्वय परिषद्का युवा उपाध्यक्ष लागि उम्मेदवारी घोषणा गरेका अब्दुलले स्वदेशमै युवाहरुलाई रोजगारी सिर्जना गर्न आफू लागि पर्ने बताए ।
कर्मथलो विदेश भए पनि स्वदेशमा लगानी गरेर धेरै नेपालीहरुलाई रोजगारी दिने अब्दुलले बताए । उनले विदेशमा व्यवसाय गरिरहेका साथीहरुलाई स्वदेशमा लगानी गर्न पनि अपिल गरेका छन् । बिगतमा एनआरएनए कतार र एनआरएनए आईसीसी लगायत विभिन्न संघसंस्थामा रहेर बटुलेको अनुभबलाई आगामि कार्यकालमा अझ उपयोग गर्ने उनले बताएका छन् ।
युवा पुस्ताका मुद्धाहरु स्थापित गर्न, दोस्रो पुस्ताका नेपालीहरुलाई एनआरएनएमा आकर्षित गर्न र विदेशमा बस्ने श्रमिकहरुका आवाजलाई शसक्त रुपमा उठाउँन समर्पित हुने प्रतिबद्धता व्यक्त गरेका छन् । युवाको वृहत सहभागिता, संस्थाको दीगो सफलता, श्रमको सम्मानसहित विदेशको सीप, पुँजी र ज्ञान नेपाल भित्र्याउँने तथा समृद्ध नेपालमा एनआरएनएको सहभागिता आफ्ना मूल मुद्दाहरु रहेको कुरामा उनले जोड दिए ।
‘आगामी कार्यकालका लागि सबैको आग्रह र एनआरएनएभित्र काम गर्न सक्ने पदमा पुगेर संगठन र देशका लागि केही गर्ने इच्छा अनुसार मैले एनआरएनए आइसीसी युवा उपाध्यक्ष पदका लागि उम्मेदवारी निर्णय गरेको छु ।’ उनले भने, ‘गैरआवासिय नेपाली संघ (एनआरएनए) अन्तर्राष्ट्रिय समन्वय परिषद्को युवा उपाध्यक्षमा मलाई जिताएर सबैले सघाउनु हुनेछ भन्नेमा विश्वास लिएको छु ।’
