बागमती २८ भदौ । बागमती प्रदेशका मुख्यमन्त्री राजेन्द्रप्रसाद पाण्डेले प्रदेश सरकार सञ्चालनका लागि आवश्यक पर्ने स्थायी भौतिक संरचना हेटौँडाको हटियामा निर्माण गरिने बताउनुभएको छ । हेटौँडामा आज आयोजित पत्रकार सम्मेलनमा मुख्यमन्त्री पाण्डेले हेटौँडाको हटियामा प्रदेशको मुख्यमन्त्री कार्यालय, मन्त्रालय र संसद् भवनसमेत निर्माण गर्ने गरी तयारी थालिएको जानकारी दिनुभयो ।
“हटियामा ५५ बिघा क्षेत्रफल भएको सरकारी जमिन छ त्यही जग्गामा प्रदेश कार्यालय बनाउने तयारी थाल्दै छौँ”, उहाँले भन्नुभयो । मुख्यमन्त्री पाण्डेले एकै स्थानमा मुख्यमन्त्री कार्यालयसहित सबै मन्त्रालय र संसद् भवन पनि निर्माण गर्ने तयारीका साथ काम अगाडि बढेको बताउनुभयो । प्रशस्त जमिन भएकाले उक्त स्थानमा नेपाल प्रहरी तथा सशस्त्र प्रहरीका लागि आवश्यक पर्ने कार्यालय तथा आवश्यकताअनुसार अन्य कार्यालय पनि निर्माण गर्न सहज हुने उहाँको भनाइ थियो ।
जग्गा प्राप्तिका लागि सङ्घीय सरकारसँग काम भइरहेको मुख्यमन्त्री पाण्डेले बताउनुभयो । कार्यालय निर्माणका लागि चालु आर्थिक वर्षको बजेटमा रु एक अर्ब पाँच करोड बजेट छुट्याइएको पाण्डेले जानकारी दिनुभयो । “यो बजेट पर्याप्त होइन तै पनि काम सुरु गर्नका लागि यो बजेटले सहज हुन्छ । ठेक्कामार्फत काम गर्ने तयारीमा छौँ”, मुख्यमन्त्री पाण्डेले भन्नुभयो ।
